وزیراعظم کا بڑا فیصلہ: ملک میں نئے ڈیم بنانے کی حکمت
عملی تیار
وفاقی وزیر اطلاعات عطااللہ تارڑ کی تصدیق
پاکستان میں پانی اور توانائی کے بڑھتے ہوئے مسائل کے حل کے لیے ایک اہم پیشرفت سامنے آئی ہے۔ وفاقی وزیر اطلاعات عطااللہ تارڑ کے مطابق وزیراعظم شہباز شریف نے چاروں وزرائے اعلیٰ کی مشاورت اور حمایت سے نئے ڈیم بنانے کی حکمت عملی تیار کرلی ہے۔
دیامر بھاشا ڈیم کی فوری تکمیل پر زور
عطااللہ تارڑ نے نجی ٹی وی سے گفتگو میں بتایا کہ ڈیموں کی تعمیر کے حوالے سے متعدد بار مشاورت ہوچکی ہے۔ وزیراعظم نے واضح ہدایت دی ہے کہ دیامر بھاشا ڈیم کو جلد از جلد مکمل کیا جائے تاکہ پانی اور بجلی کے مسائل پر قابو پایا جاسکے۔
صوبوں کا وفاق کو مکمل تعاون
اجلاس کے دوران وزیراعلیٰ خیبرپختونخوا علی امین گنڈاپور نے بھی ڈیموں کی تعمیر کے لیے مالی تعاون کی پیشکش کی۔ دیگر صوبوں نے بھی وفاق کو ہر ممکن تعاون کا یقین دلایا ہے۔
سیلاب سے متاثرہ علاقوں پر کوئی سیاسی تفریق نہیں ہوگی
وزیر اطلاعات کے مطابق سیلاب سے متاثرہ علاقوں میں امدادی کارروائیوں اور نقصانات کے ازالے کے دوران کسی قسم کی سیاسی تفریق نہیں برتی جائے گی۔ پانی اترتے ہی نقصانات کا تخمینہ لگانے کا عمل شروع کردیا جائے گا۔
ماحولیاتی تحفظ پر زور
عطااللہ تارڑ نے کہا کہ ملک کو قدرتی آفات سے بچانے کے لیے شجرکاری ناگزیر ہے۔ انہوں نے خبردار کیا کہ درخت کاٹنے والوں کا سخت احتساب کیا جائے گا۔
دریاؤں میں خطرناک صورتحال
یاد رہے کہ بھارت کی جانب سے پانی چھوڑے جانے کے بعد دریائے راوی، چناب اور ستلج میں شدید سیلابی صورتحال پیدا ہوگئی ہے۔ کئی علاقے زیرِ آب آچکے ہیں، وزیرآباد کی گلیاں اور بازار ڈوب گئے ہیں جبکہ کرتارپور گوردوارہ بھی سیلابی ریلے کی زد میں آچکا ہے۔
فلڈ فورکاسٹنگ ڈویژن کے مطابق دریائے راوی میں جسڑ کے مقام پر ستر سال بعد اور شاہدرہ کے مقام پر 37 برس بعد ایسی غیرمعمولی صورتحال دیکھی گئی ہے۔
0 Comments